Hrikaleg átök á Grettishátíð

Grettishátíð 2005 er nú lokið. Margt var í boði og margir ferðaþjónustuaðilar með ýmis sértilboð á gistingu, veitingum, hestaferðum og veiði. Skemmtidagskráin sjálf fór fram dagana 6. og 7. ágúst á Grettisbóli og á Bjargi, fæðingarstað Grettis sterka. Þar var haldin fjölskylduhátíð með ólíkum atriðum og uppákomum. Sögur voru sagðar, veitingar bornar fram, leikir háðir og keppt í aflraunum. Ritstjóri Umhverfisfrétta var svo lánsamur að vera staddur á Bjargi á sunnudeginum 7. ágúst og fékk að hitta marga kappa, gesti og sveitunga.

-

Boðið var upp á íslenska glímu. Þjóðaríþróttinni voru gerð góð skil og allir fengu tækifæri til að prófa sporin undir góðri leiðsögn lærðra manna

-----

Bekkirnir voru þétt setnir inni í veitingatjaldinu þar sem fyrstu atriðin fóru fram. Úti á hátíðarsvæðinu ringdi á réttláta sem rangláta en hlýtt var í lofti og því má e.t.v. segja að veðrið hafi verið hið skemmtilegasta

--

Tekið á honum stóra sínum. Það reyndist kvennskörungunum næsta auðvelt að keppa í bíldrættinum enda var Andrés, umsjónarmaður aflraunakeppninar, óspar á hvatningarorðin

-

Allir virtust skemmta sér vel og þá ekki síður yngri kynslóðin sem var í flestum tilvikum gúmmíklædd frá öxlum til ylja. Árni, alveg að verða 7 ára, var ánægður með daginn og þótti þetta vera hin besta skemmtun
Síðasta þrautin í aflraunakeppninni var hin alræmda dauðaganga, stundum kölluð. Hún fólst í því að burðast með íþyngjandi birði stutta vegleysu í kappi við tímann. Það sást vel á keppendum hverjir eru vanir að annast matarinnkaup fjölskyldunar...
en það eru að sjálfsögðu karlarnir. Hér eru þeir að nálgast markið með 45 kg í hvorri hönd

Með aflraunakeppninni lauk fjölbreyttri dagskrá Grettishátíðarinnar árið 2005. Óhætt er að segja að hátíðin hafi tekist vel þrátt fyrir að veðurguðirnir hafi ekki verið í sólskynsskapi á sunnudeginum. Spennandi verður að fylgjast með hátíðinni að ári en þá verður hún haldin í 10. sinn.
-