Umhverfisvæn innkaup

-

Sveitarstjórn Húnaþings vestra hefur nú staðfest drög að umhverfisvænum innkaupum sem umhverfisstjóri lagði fyrir byggðarráð þann 19. desember síðastliðin. Tillagan er unnin í samræmi við aðrar áætlanir sveitarfélagsins sbr. Framtíðarsýn, staðardagskrá 21 fyrir Húnaþing vestra. Byggðarráð lýsti yfir ánægju sinni með framsetta stefnu og samþykkti hana fyrir sitt leyti.

-

Svona seðla brúkuðu vel stæðir Húnvetningar snemma á síðustu öld til að kaupa ýmsar nauðsynjar og óþarfa.

-

Stefna Húnaþings vestra varðandi umhverfisvæn innkaup er eftirfarandi:

-
1. Við innkaup skal athugað hvort raunveruleg þörf er fyrir vöruna eða hvort hægt er að bæta úr þörfinni án þess að kaupa nýja vöru.

-
2. Við innkaup skal leitast við að velja vörur sem framleiddar eru sem næst notkunarstað.

-
3. Við innkaup skal taka tillit til endingar og orkunotkunar vörunar.

-
4. Við innkaup skal velja vörur sem eru síður skaðlegar heilsu manna og umhverfinu en sambærilegar vörur ætlaðar til sömu nota.

-
5. Við innkaup skal velja vöru með viðurkenndum umhverfismerkjum eða vörur sem uppfylla sambærileg skilyrði þó þau beri ekki umhverfismerki.

-
Sveitarstjórn Húnaþings vestra beinir því til forstöðumanna stofnana sveitarfélagsins að framfylgja þessari umhverfisstefnu en umhverfis- og garðyrkjustjóri mun á næstunni kynna hana nánar.
-