Engin svæði í sýslunni voru hér áður friðuð fyrir sauðfé, en sauðfárrækt hefur alltaf verið mikil. Brautriðjandi í trjárækt á Hvammstanga var Sigurður Eiríksson, en hann hóf ræktun trjágróðurs á litlum bletti skammt sunnan við þorpið árið 1957 og um svipað leyti hóf hann ræktun í garði hjá Sjúkrahúsinu. Smátt og smátt áttuðu menn sig á því að þetta væri hægt, enda þótt skilyrðin væru ekki góð og gróður yxi hægar en víða annars staðar. Skógræktarfélag Vestur-Húnavatnssýslu var stofnað 1974 á Hvammstanga og var einn helsti hvatamaður að stofnun þess Agnar Gunnlaugsson frá Kolugili. Ekki var haldinn annar fyndur í félaginu fyrr en árið 1980. Þó höfðpu félagarnir unnið eitthvað að skógrækt og í júlí 1978 samþykkti hreppsnefnd Hvammstangahrepps að úthluta félaginu land til ræktunar í Kirkjuhvammi. Ekki voru allir á eitt sáttir um þá ákvörðun því á almennum sveitarfundi í júní 1979 gagnrýndu ýmsir hreppsbúar ákvörðunina og virðist helst sem mönnum hafi fundist þetta sóun á fjármunum og góðu beitilandi. Síðan 1980 hefur félagið starfað nær samfellt og hefur starfsemin fyrst og fremst falist í ræktun landskikans í Kirkjuhvammi, endursölu á trjáplöntum til einstaklinga og ráðgjöf til áhugamanna um skógrækt.Frá árinu 1979 hefur Skógræktarfélag Hvammstanga unnið að gróðursetningu í Kirkjuhvammi og hefur fjöldi plantna sem settar hafa verið niður aukist ár frá ári. Eins og annars staðar á þessu svæði er vöxturinn hægur, en smám saman hefur Hvammurinn verið að breyta um svip. Úr aðalskipulagi Hvammstanga 1992-2012.
Engin ummæli:
Skrifa ummæli